La sà la teoria,
la j ha risôlt i quìz,
la ha dè l'esâm ad guìda,
la s'è cumprè la Prìnz.
Adèssa da par lìa
la mèrcia prôpi 'd brött,
mitìv si marciapìa
sinò la v'stènd a tött!

RITORNELLO
L'ètar dé cmè un incusciènta
la j è pàssa cun e' ròss,
la j ha ciàp 'na biciclètta
la l'ha bötta zö int e' fòss;
che sgrazjì ch'u j éra sôra
u j è scàpp pr'e' bùs de gàtt,
lè stè sö cun j öçç ad fôra
che rugìva cumè un màtt:
"T'cì una dilinquènta!
t'cì una da lighì!
chi t'ha dè la patènta?!
chi t'ha dè la patènta?!"

La zìra par la via,
la n'guèrda prôpi invèll,
s'la fa mèrcia indrìa,
la sbàtt int i canzèll.
Invìci ad guardè avènti
la s'guèrda int e'spicètt:
burdèll, s'a n'stasì 'tènti
la v'rìva int e' cupètt!

RITORNELLO
U n'è pàss gnènca una stmèna
che int e' zèntar dla Zità
la marcèva fôra 'd mèna
e la guardèva in qua e in là;
a un burdèll che caminéva
la j ha càzz un gran spatàss
e un ènt pô la l'amazzèva
int e sbàtal sôra i sàss;
E pö' una màssa d'zènta
ch'la s'métt a rugìj drì:
"Chi t'ha dè la patènta?!
chi t'ha dè la patènta?!"


Vnànd zö par la calèda
l'andèva a piö non pòss,
la j ha indrizè una curva,
la s'va a cazzè int e' fòss.
L'è rìv la Polizìa,
Pompieri e Pront Socôrs
j ha cnù cavèla in sìa
e purtèla in Chirurgìa.

RITORNELLO
Una gàmba i l'ha inzissèda
e i j ha inzissèd un bràzz,
i j ha fassè la tèsta
ch'la pè guàsi un baldàzz.
Cun tött agli òssi rötti
la röggia tött e dé:
"Li m'càpta prôpi tött,
al càpta tötti a mé!"
I dutùr cun la pazènzia
alôra i cmìnza a dì:
"Chi t'ha dè la patènta?!
chi t'ha dè la patènta?!"